Невромускулна сколиоза може да се јави кај деца кои имаат медицински состојби како: церебрална парализа, спина бифида, повреди на ‘рбетниот мозок, спинална мускулна атрофија или други синдроми кои влијаат на нервниот или мускулниот систем.
Знаци и симптоми
Знаците на невромускулна сколиоза често се појавуваат во првите години од животот на детето. Вообичаени симптоми се: нерамни рамења, наведнување на едната страна во споредба со другата и испакнување на ребрата или половината на едната страна од телото. Ова нарушување предизвикува тешкотии со рамнотежа и усогласување на постурата, и влијае на тоа како седи и оди детето.
Дијагноза
Дијагнозата може да се потврди преку физичка проценка од ортопед, физијатар, неврохирург или невролог.
Третман
Во голем број случаи кривите од невромускулната сколиоза напредуваат и во зрелоста. Како што се зголемува големината на кривата на сколиозата, пациентот може да развие прогресивно губење на рамнотежата и потешкотии со подвижноста и одењето.
Корсетот за сколиоза може да се препорача за подобрување на состојбата на‘рбетниот столб. Главната цел на оваа ортоза е да обезбеди стабилност, урамнотежување на ‘рбетот и зголемување на рамнотежа при седењето. Корсетот не може да го корегира овој тип на сколиоза, но може да ја спречи прогресијата на искривување на ‘рбетот.
