Maja Kostovska është një e re që ka forcën dhe guximin, siç thotë ajo, të pushtojë botën. Edhe pse ajo ka hemiparezë dhe ka vështirësi në lëvizjen e këmbës dhe krahut të djathtë, nuk ka kufizime për të.
Operim i rëndë në kokë
Kur ishte vetëm 16 vjeçe, ajo pati një aksident automobilistik, nga i cili mori lëndime të rënda në kokë. Ajo është operuar menjëherë, por nuk dihet nëse do të mbijetojë. Pas operimit, Maja kalon 21 ditë në koma.
“Në aksidentin e trafikut, un isha më shumë e lënduar dhe pikërisht në kokë. Bëra dy operime dhe prognoza ishte që ose do të përfundoja fatalisht ose nuk do të ecja më”, tregon Maja për momentet më të vështira të jetës së saj.
U ngrita përsëri në këmbë
Pas operimit, pason një sfidë e re, ajo nuk mund të flasë dhe të ecë. Për shkak të dëmtimeve të ndërlikuara, askush nuk jep shpresë se do të qëndrojë në këmbë. Si një vajzë e re, me jetën e saj përpara, ajo e ka të vështirë të pranojë situatën e re. Por me mbështetjen e prindërve, të afërmve dhe miqve ia del ndaj të pamundurës.
“Kur përballesh me vdekjen në moshën 16-vjeçare, është vërtet e vështirë, por kur rikthehesh në rrugën e jetës, e kupton se sa e mrekullueshme është jeta. Do të mësoni t'i shikoni gjërat ndryshe, të jeni të lumtur edhe me gjërat më të vogla, të shijoni çdo ditë të re. Me këmbëngulje, terapi dhe ushtrime, forca dhe shpresa ime filloi të kthehej gradualisht. Mbaj mend një ditë që thashë se jeta nuk ka mbaruar këtu, duhet të jetosh dhe të luftosh. Dhe ia dola dhe sot po eci”, shpjegon Maja për momentet kur hedh sërish hapat e parë.
Unë jam një femër e guximshme dhe e fortë
Edhe pse në fillim i vjen keq, e kupton shpejt se mund të bëjë gjithçka me njërën dorë. Ajo është e lumtur dhe mirënjohëse që jeta i dha një mundësi të re. Ajo nuk dëshiron që njerëzit ta shohin me keqardhje.
“Njerëzit vazhdimisht më shikojnë ndryshe dhe me keqardhje. Por nuk ka nevojë të më trajtojnë kështu, unë jam një femër e guximshme dhe e fortë dhe nuk ka nevojë për keqardhje për mua”, thotë Maja duke buzëqeshur.
Tani që ka një mundësi të dytë në jetë, ajo e jeton jetën në maksimum, sepse siç thotë vetë, nuk e di se çfarë të pret në mëngjesin tjetër.